تحليل_ الاسماعيلي - ميدو أمام البنك الأهلي
تعادل الاسماعيلي في ثاني مباراة له تحت قيادة ميدو سلبيًا أمام البنك الأهلي بدون أهداف، بدأ ميدو المباراة بطريقة 4-2-3-1 بثنائي ارتكاز محمد حسن وعماد حمدي، وشارك ياو أنور مهاجم صريح، وبدأ الشبراوي وعبد الرحمن مجدي عالأطراف.
Build Up
في تحضير الهجمة الشوط الأول كنا بنعتمد علي كرات طويلة للأجنحة بشكل 2-4-3-1 بتقدم الظهيرين لخط نص الملعب وتأخر أحد الإرتكازين قدام خط الدفاع عن الإرتكاز التاني.
الكرات الطويلة مكنتش مجزية الشوط الأول لأن مفيش لاعب طويل وتباعد الرباعي اللي قدام عن بعضه فكان اعتمادنا كله علي استرجاع لاعبي النص للكرة الثانية.
في الشوط الثاني بدأ يبقي فيه تحضير للعب علي الأرض أمام الضغط المتقدم وبدأ الإعتماد عالأطراف في الخروج بالكرة، بتمرير الكرة للظهير ووقتها الجناح بينزل يستلم ويميل عليهم صانع اللعب في نفس الجهة.
وبدأنا نلعب تمريرات بين الخطوط في مساحات في ضهر خط نص البنك، بتحرك عبد الرحمن مجدي من الطرف اليمين للعمق
Final Third
تصرفنا قدام الدفاع المتأخر مكنش فيه جمل كتير بس كان فيه جملتين مهمين، واحدة أساسية وهي ان دايمًا اللي يباصي يتحرك بعد الباص في مساحة، واقرب لاعب للي معاه الكرة بيتحركله علشان يفتحله زاوية تمرير.
الجملة التانية كان فيه تركيز كبير علي الأطراف، لعمل جملة متكررة بين الباك والجناح، ان الباك يتاعنا يسحب باك الخصم فيفضي مساحة في ضهره فينطلق فيها الجناح، والعكس.
بس كان عندنا مشكلتين، ان مفيش زيادة عددية في المنطقة اننا نلعب عرضية، واننا كنا بنخسر الكرة عالطرف بسهولة، سواء بقرارات فردية من الشبراوي او تراخي من عبد الرحمن مجدي، من كواليتي باص سيئة من الباكات.
بدأنا نتجه للكرة الطويلة لباسم مرسي بعد نزوله ونحاول ناخد الكرة التانية، نجحت مرة بكرة لمدبولي بس مكنتش ناجحة فكرة اننا نسقط كرة في ضهر دفاع الخصم وباسم يجري في المساحة في ضهر الدفاع. غير ان كان تباعد الرباعي الهجومي عن بعض للانتشار بشكل احسن في المنطقة كان بيمنعنا نعمل كثافة حوالين الكرة التانية.
Low Block
دي الحالة الأبرز اللي طبقناها في الماتش، ودي ناتجة عن رغبة ميدو اننا منخسرش ايًا كان، وطول ما احنا ماستقبلناش جول فاحنا لينا أفضلية في الماتش.
كنا بندافع بشكل أقرب ل 442، قدام هجوم بشكل 343 بخطوط متقاربة جدًا بين خط النص والدفاع، فكان ياو أنور ومدبولي بيراقبوا ارتكازين البنك مع تقدم أنور للضغط علي مساك البنك. وتقدم عبد الرحمن مجدي في الناحية اليمين للضغط علي المساك الشمال للبنك لما الكرة توصله.
مع رقابة مان تو مان من محمد حسن لرزاق سيسيه في الناحية اليمين. مع تقدم الباك اليمين عصام صبحي انه يضغط علي بعقوبوا باك شمال البنك، ومحمد حسن يرحل يغطي ورا عصام.
ده كان بيعمل مشكلة ان فيه ارتكاز بيفضي لما أنور يضغط علي المساك، فكان بيعمل مشكلة كبيرة لما الكرة تكون في الناحية اليمين للبنك، محمد حسن بيبقي في العمق وبيسيب مساحة لرزاق سيسيه يستلم في الناحية الشمال. بس طول ما كانت الكرة ناحية الشمال للبنك كان محمد حسن قادر يغطي علي رزاق سيسيه عدا كرة الشوط التاني سرح فيها.
الناحية الشمال بالنسبة لنا كانت أقل تهديدًا، بس كان الشبراوي قادر يقفل المساحة ورا لما الكرة تتعكس من الجهة التانية، والمساك هاشم كان بيرحل ورا دسوقي لما دسوقي يتقدم، كان فيه تقارب جميل من اللاعيبة وتقفيل مساحات عالأطراف.
