تحليل #الإسماعيلي - ماذا قدم ميدو في المباراة الأولي
ملوش اي معني او منطق لو كان ده تحليل لإيجابيات وسلبيات الفريق أمام الزمالك الفنية، لكن ده تحليل لنقطتين، محاولة استشفاف الخطوط العريضة اللي ميدو حاول يشتغل عليها في تدريبتين بس، ورودود فعله جوا الملعب.
فالكعادة هنبدأ بتحليل كل حالة لعب من حالات اللعب علي حدا .. بدأنا بطريقة 4231
Build up
كنا بنحضر اللعب بطريقة 4222 برجوع الارتكازين أمام قلبي الدفاع ودخول مدبولي الجناح في العمق بجوار صالح جمعة مع بقاء باسم مرسي في العمق وياو انور في الطرف اليمين.
كنا بنعتمد علي حاجتين؛ الأولي .. ان لاعب من الارتكازين "مخلوف" يظهر قدام المساك علشان يستلم منه .. او يستلم من الباك لما المساك يباصيها عالطرف. ومن ثم يباصي نعكس الكرة الناحية التانية من الملعب.
الحاجة التانية لما بدأ الزمالك يضغط بشكل 424 ويضغط بشكل أقوي علي ارتكازين الفريق فبدأنا نلعب كرات طويلة لباسم مرسي في المساحة بين خط نص ودفاع الزمالك.
Final Third
الشوط الأول .. كنا بنهاجم في التلت الأخير ب ٣٢٤١ بتأخر النقاز شوية في نص ملعبنا مع تقدم دسوقي كجناح في الناحية الشمال .. ودخول مدبولي في العمق جنب صالح جمعة كصناع لعب وياو أنور كجناح يمين.
كان عندنا قصور غير طبيعي في اننا نقدر نباصي الكرة في مساحات في النص لصالح ومدبولي من مخلوف، وكنا بندور الكرة دايما لغاية ما نلاقي مساحة تتباصي عالأطراف. فبنتزنق جنب الخط.
بس الللي كان واضح اننا بنحاول دائما نقرب اللاعيبة من بعض ونلعب بشكل سريع سواء كتمريرات قصيرة او بكرات مباشرة.
مع الوقت صالح جمعة بقي بينزل هو في نص الملعب مع تقدم مخلوف او محمد حسن مكانه وبدأ هو يلعب كرات بينية في ضهر الدفاع.
احنا طول الوقت المهاجم والجناح كانوا بيتأهبوا للجري في ضهر دفاع الخصم، استعداد للكرة الطويلة.
الشوط التاني لازلنا بنحاول نعتمد علي نفس الطريقة في تسقيط كرات في ضهر الدفاع بس غيرنا الطريقة ل 433 وبدأ مدبولي يبقي في العمق أكتر كجناح مع ياو انور الناحية التانية.
Attacking Transition
كنت متوقع ان دي أكتر حالة هيكون مركز عليها، بواقع تجربته في وادي دجلة كان دي أكتر حاجة بيعتمد عليها في ظل اسلوبه الدفاعي هناك بكرات مباشرة لعرفة السيد، فكان بيعمل نفس الفكرة مع باسم مرسي، اول ما تستلم الكرة العبها طويلة في ضهر الدفاع لباسم اللي بيكون محضر نفسه للجري بين المساكين.
Midfield Press
كان ده نظام الضغط الأبرز أول نص ساعة الشوط الأول ومكناش بنعمل ضغط متقدم، كنا بنضغط بشكل 4411 بوجود لاعب مع ارتكاز الزمالك الدفاعي ورقابة الارتكازين بتوعنا للإرتكازين اللي قدام ارتكاز الزمالك الدفاعي مع وجود خط الدفاع لعي بعد 12 ياردة من خط النص.
الظهير كان بيتطرف من مكانه مع الجناح في جهة الكرة.
استقبلنا الهدف الأول من كرة طويلة في ضهر الدفاع ملحقناش نتعامل معاها بشكل سليم من المساكين .. المهم بالنسبة لي ان بعد الجول ده بدأنا نأخر خط الدفاع أكتر علشان نتجنب خطورة الكرات الطويلة.
Low Block
الشوط الاول كنا بندافع بطريقة 4411 او طريقة 442 بوجود تقريبًأ مساحة 12 ياردة بين خط النص والدفاع. مع دخول الجناح العكسي لمكان الكرة في العمق.
الجول الثالث للزمالك جه من زيادة عددية وليهم عالطرف الشمال وتناقل الكرة اكتر من مرة فظهرت مساحات كتير في في العمق وخلف الباك اليمين، علشان كدة ده كان سبب تغيير الطريقة في الشوط التاني ل 4141 في الدفاع المنخفض.
High Press
طبقنا حالات ضغط متقدم بس بشكل نادر جدًا خاصة بعد الهدف التاني للزمالك، كنا بنضغط بكل 4231، بدخول ياو انور لعمق الملعب وتقدم خط الدفاع لمنتصف الملعب.
