تحليل #ديربي_مانشستر - تنظيم تين هاج الدفاعي أمام حلول جوارديولا" القليلة"
بدأ مانشستر يونايتد المباراة بطريقة 4231 بوجود فريد بجانب كاسميرو كلاعبي ارتكاز، برونو في الجناح اليمين وايركسين في مركز رقم "10". وبدأ مانشستر سيتي ب 4141 بثلاثي وسط رودري وبيرناردو ودي بروينه مع وجود محرز وفودين عالأطراف.
نجح مانشستر يونايتد بنسبة كبيرة في تحجيم مانشستر سيتي في التدرج بالكرة في كل حالات اللعب الدفااعية، ضغط متقدم أو متوسط او متأخر.
** الضغط المتقدم
في الضغط المتقدم، اليونايتد كان بيضغط ب 4213، اعتمادًا علي دفاع مان تو مان برقابة ايركسين ل رودري، وفريد لدي بروينه، وكاسميرو لبيرناردو سيلفا.
مع وجود الأجنحة راشفورد وبرونو في عمق الملعب بين مساك وباك السيتي، بحيث يقدر يضغط عالمساك وهو قافل زاوية التمرير علي الباك وفي نفس الوقت مدي حماية اضافة لمنع تمرير الكرة في عمق الملعب لدي بروينة او سيلفا.
تين هاج كان متقبل فكرة وجود زوايا تمرير من المساك للباك بالنسبة للسيتي، لأنه كان بيحاول بعدها يضغط ب2 لاعيبة علي الباك ( الجناح القريب + لاعب الارتكاز).
مثال : لو الكرة خرجت عند كانسيلو الباك الشمال، برونو وفريد بيتحركوا تجاه كانسيلو، والعكس في الجهة التانية عند والكر قدامه راشفورد وفريد.
مشكلة السيتي في الشوط الاول كانت لما الظهير بتوصله الكرة بيبقي معزول وبيضطر يتصرف بشكل فردي فبتتقطع الكرة او بيرجع بيها لورا مرة تانية.
** الضغط المتوسط
في المرحلة دي كان تين هاج بيطبق نفس الفكرة بس بخط متراجع لمنتصف نص ملعب السيتي، فبدأ بيرناردو لاعب الارتكاز ينزل بين قلبي الدفاع علشان يقدر يعمل زيادة عددية ويستلم الكرة في مكان بدون ضغط، بعد ميس باص عمله تحت ضغط من كاسميرو.
بيرناردو قدر مرتين يخرج باص في ضهر راشفورد لوالكر لكن بعد كدة بدأ يقابل ضغط من برونو اللي بدأ يدخل في العمق أكتر يضغط علي بيرناردو مع قفل زاوية التمرير لوالكر من راشفورد ومارثيال.
الشوط التاني حاول جوارديولا انه يغير في التقدم بالكرة أمام الضغط المتقدم والمتوسط وبدأ يوظف والكر كلاعب ارتكاز في العمق علشان يعمل زيادة عددية، نجح في الفكرة دي لأول مرة بس وبعدها قابلها رقابة فردية من اليونايتد من أقرب لاعب ليه، والتضحية بالضغط علي قلبي الدفاع.
مثال : انتوني بعد نزوله مكان مارثيال بقي هو اللي بيراقب رودري، لأن ايركسين بقي هو اللي بيراقب والكر لما والكر يتواجد في العمق.
ولما والكر يتحرك للطرف، راشفورد بيبدأ يراقب والكر، او لما فريد خرج مرة يراقب والكر اتحول راشفورد اتوماتيك لمراقبة دي بروينه.
** الضغط المنحفض
ماختلفش الحالة دي كتير عن حالتين الضغط اللي في الأول، بس ظهر فيها أكتر تركيز الاجنحة علي قفل زوايا التمرير في العمق.
نظام دفاع تين هاج أمام حلول السيتي
خطورة السيتي في التعامل مع ضغط اليونايتد المتقدم والمتوسط كانت في وجود لاعب قريب من الظهير اللي بتخرجله الكرة في مساحة، في كرة في الشوط الأول لما رودري اتحرك تجاه والكر وقدر يخرج بكرة في مساحة بوان تو.
وكرة في الشوط التاني لما بيرناردو قرب من كانسيلو وانطلق الاخير بوان تو بين الاتنين.
في الكرات دي لما كان بيقدر السيتي يعدي خط ضغط اليونايتد، كان بيتراجع لاعبي وسط اليونايتد بسرعة لنص ملعبهم، في كة الفريق تراجع كله لمنطقة جزائه في أقل من 13 ثانية.
وتم الترحيل بشكل ممتاز، لما فريد غطي مكان مالاسيا، اللي رجع بسرعة لمركزه وايركسين رجع غطي العمق مكان كاسميرو اللي كان موجود عالطرف.
تحركات رباعي دفاع اليونايتد كانت منظمة وده مكنش بيدي مساحات للسيتي حتي لما بيقدر يخرج من ضغط اليونايتد.
او في حالات الدفاع المنخفض لليونايتد، كان بيحاول السيتي يعمل أكتر من خدعة بدخول فودين للعمق من الناحية الشمال، او تحرك محرز للوسط وانطلاق دي بروينه في ضهره، او تحرك محرز عالطرف وعمل فراغ في عمق الدفاع.
فكان بيتم التعامل مع التحركات دي بنظام، ولما محرز كان يتحرك للعمق مالاسيا وقف وفريد هو اللي استلم محرز ومالاسيا هو اللي استلم دي بروينه. ومع دخول فودين للعمق كان الجناح اللي وقتها كان راشفورد في الجهة دي بينزل يقفل زاويا التمرير ليه.
