تحليل #كاس_العالم - أنطوان جريزمان .. الإرتكاز الوهمي أمام الدنمارك
قرار ديشامب بالاعتماد علي طريقة 4231 لسه مفاجى بالنسبة لي، لأن كل التوقعات بخصوص التشكيل كانت بين هل هي 433 حتي مع اصابة بوجبا وكانتي لأن دي الطريقة الشهيرة لديشامب وحقق بيها كاس العالم. ولا هيعتمد علي ارتكازين بس وهنا هيلعب ب 352 اللي اعتمد عليها كتير في التصفيات ودوري الأمم الأوروبية.
لكنه قرر أنه هيلعب 4231 ويعتمد علي ارتكازين بس بدون ثلاثي في خط الدفاع، فكان التساؤل الأكبر ازاي هيقدر يبني منظومته الدفاعية بارتكازين بس ! ده اللي هنشوفه حصل ازاي
في البداية حابين نتكلم علي الشكل الدفاعي لفرنسا قدام الدنمارك في ظل اعتماد ديشامب علي ال Low Block والدفاع بكتلة منخفضة من نص ملعبه .
الدفاع قدام الدنمارك
لاعبي الدنمارك في التلت الأخير كان بيعتمدوا علي 3421 ب 3 مساكين، وتقدم الباكين، ويتمركز الارتكازين، هويبرج وايركسين قدام المدافعين، مع وجود ثنائي خلف المهاجم في العمق.
ديشامب قرر انه يحرر مبابي من الدفاع، اكتفي بس انه يقف علي زاوية التمرير من المساك للباك اليمين للدنمارك.
فباقي اللاعبين ظهروا بشكل 432، ب 2 في الخط الامامي جريزمان ناحية اليمين بيراقب ايركسين، وفي النص جيرود بيقابل المساك وبيقفل زاوية التمرير للإرتكاز التاني هويبرج.
مع رقابة تشاومني ورابيو للثنائي المتواجدين خلف المهاجم.
مع بعض الأفكار اللي كان بيحاول يلجألها منتخب الدنمارك، زي ان الارتكازين يتحركوا لأطراف الملعب علشان يسحبوا جيرود وجريزمان ويفضوا مساحة للمساك انه يتقدم بالكرة. بس هنا رقابة تشاومني ورابيوت للثنائي اللي خلف المهاجم كان بيخلي حامل الكرة بدون حلول.
او انهم يعملوا زيادة عددية علي رابيوت، بتحرك الارتكاز الدفاعي هويبرج لقدام شوية، وده الارتكاز اللي كان بيمسكه جيرود، علشان يعمل زيادة عددية مع لاعب من الثنائي اللي ورا المهاجم علي رابيوت.
هنا رابيوت كان بيبقي ذكي انه بيقف وسط ال 2 لاعيبة ويقرر يضغط علي اللي ليه فرصة أكبر انه يستلم الكرة.
أدوار جريزمان كلاعب وسط
احد الخدع اللي كان بيحاول يعملها لاعبي الدنمارك وهي كانت بتحرك الثنائي اللي خلف المهاجم لجهة بحيث يسحبوا تشاومني ورابيوت لنفس الجهة ويفضوا مساحة لايركسين في الجهة المعاكسة.
فكان ده دور جريزمان انه يكمل مراقبة لإيركسين ويغطي المساحة اللي جنب ثنائي الإرتكاز دي.
أو لاعب من الثنائي اللي خلف المهاجم يتحرك لوسط الملعب ويفضي مساحة في العمق ويبدأ ايركسين هو يتحرك لقدام فكان اللي بيغطي المساحة اللي موجودة في النص دي هو جريزمان.
كان بيحاول يستغل لاعبي الدنمارك استغلال المساحة اللي مش بيدافع في مبابي في الناحية الشمال. فكانت خطة ديشامب هو الترحيل، فكان تيو هيرنانديزالباك الشمال بيتقدم يضغط في المساحة اللي ورا مبابي، ويتحرك اوباميكانو المساك للطرف ظهير أيسر، ويبدأ الارتكاز تشاومني يرحل كمساك. ويبدأ رابيوت انه يتحرك أكتر عالطرف.
وهنا جريزمان هو اللي بيغطي تحركات تشاومني ورابيوت، ويتمركز في النص علي حدود منطقة الجزاء.
في أحد اللقطات رابيوت اضطر يدافع في الناحية الشمال كأنه جناح شمال، وبدأ تشاومني يرحل شوية ناحية الشمال ودي ناحية تواجد الكرة، فهنا جريزمان رجع كإرتكاز تاني بجوار تشاومني.
الخريطة الحرارية لجريزمان في المباراة
